Јавен час на тема „Да го чуваме и негуваме мајчиниот јазик“

21.02.2025

Во рамки на славењето на меѓународниот ден на мајчиниот јазик, Библиотека Феткин во соработка со СОЗШУ „Ѓорче Петров“ Кавадарци организираше јавен час на тема „Да го чуваме и негуваме мајчиниот јазик“.
Директорот на библиотеката ги поздрави учениците и направи кратка анализа за ситуацијата во светот со намалувањето на бројот на официјални јазици, истакнувајќи ја потребата од борбата која е оставена пред младите генерации за чување и негување на мајчиниот јазик.
За оваа активност учениците импровизираа час на кој секој од учениците присутни на часот на свој начин искажа свое видување на мајчиниот јазик. Дел од учениците читаа свои литературни творби, а се читаа и песни од народната и современата литература по кои се направи споредба во изразувањето на народниот и современиот литературен македонски јазик.